COLO
Çiqas ke qalê Coloyî bîyêne, pîlan derheqê ey de vatêne: “Col reqîwer u peyayêde şimitox bi.” Col, eslê xo de merdûmêde baqil bi u waxtê xo de mektebo wertên (ortaokul) wendo. Peydo se beno rind nêzano, no aqil serê ey ra şono u beno serxoşêde zemanî. Çi kuno dest, şimeno. Eke reqî kewtê dest, reqî; nêkewtê dest kî, îspîrto ra bigê hetanî bira, kolonya…
Çeleyê zimistanê qersêni bi. Col, ancî henî pejmurde, dest de şûşeyê îspîrto ver bi Çarşîyê Corî şono. Nêmeyê şewî bi. Kes çarşî de nêmendo, kulî ancîyê çêyê xo. Tarî yo, henî şenik astareyî mendê ruyê asmênî de. Col endî bi senê halî êno, reseno verê Dîwan Restorantî. Heşê xo êno, şono. Pîştî ser meredîno ra, qilmêde bîne cêno îspîrtoyî ra. Asmên de nîya dano. Se ke astareyî kewtê têwîrane, heşê Colî êno u şono. Çimanê xo giran giran keno qapat u şono dewa xo, şono bi domanîya xo.
Endî o serê ju hênî de bi. Ver bi wîsarî bi. Corê dewe bîbî gul u nergîzî. Her ca kewtîya ra şên bi. Merge de çîçeganê çeqeran u sûran eştbî têver. Bi hezaran çîçegî bîbî meymanê merganê Koyê Bîngolî. Înan cîya-cîya boye dêne. Çuçikî bi keyfweşîye amêne hênî ser ro nêne u pêydo perêne ra, şîyêne. Vengê çuçikan keyfweşîyê dêne bi mordemî. Reyêna qelfeyê qilancika amênê, nêşinê bi gilê qewaxan ra. Ebe ju veng kerdênê qişte qişte, her ca bi vengê inan bîyêne pirr.
Eke se bî, çutir bî; tawo ke Colî çimê xo kerdî ra; se ke hewnê de bo, cire henî ame. Çi est o ke zaf nêmend, reyêna peyser şî; şî domanîya xo, şî demê wendekarîya xo. O mîyan de dewe ameye aqilê dey. Der u cîranî, Deşta Uskira kewte re çimanê Coli ver. Astorî vaznayî… Qaytê Koyanê Bîngolî bi. Şî waranê peyê Koyê Bîngolî. “Koyê Bîngolî mekanê eşîran o,” vat xo xo de. Virana Koyê Bîngolî de hezar hênî bîyî. Şî serê her hênî de kulmê awe şimite. Serê her hênî de ju çênekêde rindeke dîye. Qutîya destî, qutîya ke pey de resmê dîkî bî, a qutîye da bi çênekan.
Lé eke se bî, çitur bî; bado hînî bî zereserdin. Waşt ke çimanê xo yakero, lé çimî yanêbî. Royê xo ancîya şî. Dûrî ra vengê berbişî ame.
Fecirê şodirî de însanan verê Dîwan Restorantî de ju peyayo merde dî. Destê ey de kî şûşeyêde îspîrtoyî. Xebere zerrê Gimgim ra bîye vila, resê dewanê Gimgimî. Kulî vatêne: “Col merdo”. Tayîne vatêne: “Rama Heqî şoro ra ci, cayê xo cenet bo!” Tayîne kî vatêne: “Şima Colî şenik pêya zanenê. O waxtê xo de kêm peyayo nêbi.”
Hardlerzê Gimgimî de peyayê ke çimê însanan de pîl asenê, kam ke êno bi aqilê şima, kulî amayî Gimgim. Colî o taw vato bi: “Ma hînî zanitêne ke nê zaf peyayê pîlê. Ti nêvana mendê ra min u şima. Çi pîlîye, çi hal o! Ma çimê xo de ê pîl hesabnê. Nê polîtîkerî/sîyasetwanî pêro zê fenda malimê ma bi. Zê ê qirawetê xo bi. Henî peyayê pîlî nêbî, walla mendî bî ra malimê ma!”