APÊ MISTEFAYÊ WARWAYÎ
Apo Mistefa, seba ke warway şiyêne ziyaran ser u cêrayêne, şarî cira vatêne: “Mistefayê Warwayî” yan zî “Misto Warway”. O, mordemêde zerrepak u biheq bi. Zîyar u dîyarî zanîtêne. Her tim fekê ey huyayîş bi u her tim bi herdişê cêrayêne. Jîlet nêdayêne rîyê xo ro. Budelayêde halê xo bi, fekê ey ra qesa xirabine nêvecîyêne. Serê qesa u binê qesa Apê Mistefayî “gula mi” bîye. Her kesî ra vatêne “Gula mi”.
Vanê ke ver bi wisarî bi. Ju qaymeqamê nêweş amo Gimgim. Zaf hêrsên bi. Cîranêde Apê Mistê Warwayî vano: “Bira Mistefa, bê ma şîme çarşî. Vanê Qaymeqam esnafan zîyaret keno, hama mordemêde zaf hêrsên o. Qêreno, vêreno, zê fekê kardî tûj o.” Apê Misto Warway vano: “Bira beno, şîme hama no Qaymeqam pêyayêde wendox o, qeyî biqêro, mi fam nêkerd.”
Nê danê raye, şonê bi çarşî. Qaymeqam merhebatîye dano esnafî. Raştê Mistê Warwayî kî beno, “Apo merheba!” vano cira. Tabî Misto Warway kî selamî ceno ra u “Merheba gula mi” vano cira. Eke vano “Gula mi”, zaf zorê Qaymeqamî şono. Polîsî ra vano: “No mordemê bêterbîya kam o ke mi ra vano ‘Gula mi’? Pêbigêrê berê, bierzê nezaretxane!” Polîsî hama a saete de Apê Mistefayî benê, erzenê nezaretxane. Kam pêhesîno, mutesir beno. Jubînî xeberdar kenê, vanê: “Misto Warway amo pêguretene.”
Xebere ke bena vila, tayê esnafî u cîranê Apê Mistê Warwayî benê top, şonê bi lêweyê Qaymeqamî. Hal-mesela Mistê Warwayî cira qesî kenê u vanê: “O budelayê yo, halê xo der o, her kesî ra vano ‘Gula mi’. Zerrê ey ra qeso xirabin nêvereno ra.” Qaymeqam îqna beno u Apê Mistê Warwayî dano raverdayene, nezaretxana ra vecenê anê duştê Qaymeqamî. Qaymeqam cêreno ra ci, “Qusirê mi de nîyamede!” vano.
Misto Warwayî vano: “Nê, ez qusirê to de nîyadana. Mi to ra va ‘Gula mi’, to telîyê xo kerd mi ra. Ez dawa to dana bi Olî Dîwanî!”
Vanê ke çend rojan ra tepîya, destê şodirî şilîye kerdo piro, zaf vara. Qaymeqam taxa “Batî Vartoyî” de bi jîpe şono. Nara şilîya girane ver, pird şanîno we, sel her cayî beno. Jîpa qaymeqamî kuwna laseri ver, şona. Şar reseno ci, qaymeqamî jîpe ra veceno, xelesneno. Seba ke kincê xo bîyê hîtî, Misto Warway ceketê xo cêno, dano Qaymeqamî. Roja bîne Qaymeqam êno verê çêyê Mistê Warwayî. Cênîya Mistê Warwayî u domanê ey ke qaymeqamî vînenê, tersenê. Qaymeqam vano: “Metersê, mi hewnêde zaf xirabin dî. Ez coka ama ke Apo Mistefa mi ef bikero.”
Rojan ra rojê Misto Warway nêweş kuno. Lacê ey “Pîyo bê ma şîme nêweşxane” vano. Apo Misto Warway vano: “Ero çi nêweşxane yo, ti çi vana? Roja hîrêyîne gina ra piro, mirena. Mi hewnê xo dîyo.” Na qesa ser ro cênîya Miste Warwayî vana: “To çi hewn dî ke ti ey raşt hesabnena?” Misto Warway vano: “Cênîkî, hawo 60 serrî yo ti derdê mi wena, feqîrîya mi ancena. Heqa xo serê mi helal bike.”
Tesadufî de nîyadê ke a saete de xocêyê camîye kî vecîno, êno bi çêyê Apê Mistê Warwayî. Cênîke hal u mesela mêrdê xo cira qesî kena. Xocê vano: “Haşa, hazar dolime haşa. Ti vanê ti şîya lêweyê Heqî, ama. O çi taw biwazo, o taw canê însanî cêno. Kes nêşikino no derheq de çiyê vaco. Hela ti bê camîye, bê nemaz bike. Çi karê to u hewnan jubînî de esto?” Misto Warway vano: “Çêyê mi, mi rê îbadetxane; qelbê mi, mi rê îman o. Çi karê mi esto camîya to de? Madem ti qulê Heqî ya, ma cîranê jubînî yê; merdena mi ra dime, çimê to domanê mi ser ro bo.”
Kam pêhesîyo ke Misto Warway nêweş o, kulî şonê dîyarê ey u o kulî ra “Ez roja hîreyîne de mîrena” vano.
Vanê ke roja hîrêyîne fecirê şodirî de, der u cîranî pêhesînê ke Misto Warway şîyo rama Heqî. Taxa Batî Vartoyî de şîn-şîwan… Gimgim de mordemêde zerrepak şî, cayê ey tal mend…