YAŞO U TALO
Budelayanê Gimgimî ra ju kî xo ra Yaşo bi. Eslê Yaşoyî Mûş ra yo. Vanê ke, waxtê xo de Mûşijî zaf kewtê ra Yaşoyî ser u tede leqî/yarenîye kerda. Yaşo peynîye de înan ver remayo, amo bi Gimgim.
Mûş de ju kî bi nameyê Talo est bi. Xêr mêvace, adiro sûr vacê; Talo zaf agrasîf bi. Talo her tim bi kincanê resmîyan cêrayêne. Zîmelê verê pîrnika Taloyî, zîmelê nêvacê, baltê vacê! Sey qoçê beranîyê zîmelê ey bîyî. Dûrî ra, çend metreyî dûrî ra zîmelê ey vanê ke “Ma na yîme”. Şar Taloyî ra tersêne, domanî bi nameyê ey dayêne tersnayêne. Talo ke amo çarşî, şar çarşî ra vecîyêne, cadeyî cira ca verdanê. Goreyê vatîşê şarî, Talo Kore de esker bîyo; vanê ke uca aqil kerd bi vîndî.
Mabênê Yaşo u Taloyî de qet çîyêk nêbi. Yaşoyî ke Talo çarşî de dîyêne, cira hînî xûye kerdêne u hînî tersêne ke lînganê ey hard nêguretêne. Rojêk Yaşo fîkîrîno, “Nê, bi tersî hetanî kotî?” vano, qerar dano ci u vejîno êno Gimgim. Vateyêde verênan esta: “Meyman meymanî ra hes nêkeno, wayîrê çêyî kî her dîyînî ra.” Yaşo ke ameyo Gimgim, Budelayanê Gimgimî ra Hirrê Qerqerutê u Evdilayê Înaqa Yaşo qet nêwaşto. Şarî waşto ke nê hîrêmîna bikewê rê jubînî, xo ra keyf bîyarê, la Yaşo qet nêkewtêne tela Hirrê Qerqerutê u Evdilayê Înaqa.
Xûyêde Yaşoyî kî na bi: Şarî her tim 25 quruşî dayêne ci, cira “Resmê felan kesî bîancê” vatêne. Yaşoyî se kerdêne? Yaşo se ke şono destawê, hema u toreyê haceta xo vetêne, resmê ey antêne.
Karê xo bibo yan nêbo, Yaşo her tim şîyêne çarşî. Tabî qîrawatê xo kî vileyê xo de bi. Zafêrî bi qîrawat cêrayêne. Zafêrî şîyêne verê çayxaneyê Beledîye. Kesanê ke kaxid kay kerdêne, înan de nîyadayêne. Eke ju bîvatêne “Yaşo çayê bişime”, hema kursîyê xo ra amêne dormeyê masa. Nîya yanbekî nîştêne ro. Zîmelê Yaşoyî seke bi cetwel pêmite yê, hênî bîyî. Nîya zê lakêde barî verê pîrnika xo ra têrdayî bîyî; hênî şenik serê lewî ra verdayî bîyî. Gegane hetanî nêmeyê şewî çayxane bi çayxane cêrayêne. Nêmê şewî de, çeleyê zimistanî de se raye vetêne şîyêne çê, her kes şaş mendêne…